الحمار الحقيقي .. !

فاكر الحضري ؟ أيامها قولت سبحان الله - أنا كان لسة ماليش في الكورة اوي في الوقت ده بس الموضوع شد إنتباهي - الراجل ده الناس كانت مخلياه في السما حرفياً .. كان إسم ( الحضري ) عند الناس لا يختلف كثيراً عن إسم أبوزيد الهلالي أو أحمس ، بل مش بأبالغ لو قولت إنه كان حاجة أكبر بكتير عند الناس دي .. الحضري .. ياااااه ..

وفجأة ، وفي لمح البصر .. نزلوه من السما دي وخسفوا بيه الأرض ، وداسوا عليه بالجزم .. وأصبح إسم الحضري اللي بيلحق بيه في الكلام المدح والإطراء والإنبهار ، بقي لا يذكر إلا بالسب واللعن بأقدح وأقذر الألفاظ ، وبقت سيرته وسيرة أهله مادة خصبة لصنع الحكايات اللي بتبين مدي غباؤه وجهله وندالته وووووو...

شوفت النقلة دي ؟

الموضوع إتكرر مع واحد تاني ، بس مش حارس مرمي ولا لعيب كورة ولا حاجة من دي خالص .. كاتب كبير مشهور ، كانوا مخليينه نجم برضه ، وحاجة أكبر من النجم كمان .. ومرة واحدة الآية إتقلبت خالص ..

الناس مفيش حاجة بترضيها ، مهما عملت ، ومهما هما نفسهم رضيوا عنك في الأول ، ومهما وصلوك لشهرة أو نجومية أو مجد ، في لحظة الكلام ده كله حينتهي .. بل وحتلاقي العكس تماماً ، حتلاقي إسمك اللي كان فوق بقي تحت .. سيرتك اللي كان الواحد منهم بيتشرف بذكرها وبمدحها ، حتبقي علي كل ليان وحيبقي الواحد منهم بيتشرف وبيتباهي بجعلها مادة للسخرية ..

واحد بس اللي يستحق إنك تعيش حياتك كلها عشان ترضيه .. وتتخذ كل السبل علشان ترضيه .. لإن طول ما إنت بتسعي لإرضاؤه مش ممكن يتغير عليك أبداً .. لو ما عرفتش مين الواحد ده يبقي مالهوش لازمة تقرا الكلام أصلاً لإنك مش حتفهم منه حاجة .. !

حقيقة مهمة جداً وصلتلها ، كنت بأسمعها طبعاً كتير ، لكن إتأكدت منها بعد الكلام ده .. اللي يآمن للدنيا وللناس ، يبقي حمار فعلاً .. الحمار الحقيقي !