عودة

مدونتي الحبيبة ، لبعض الوقت حسيت إني مش حأدخلك تاني أبداً .. قليل من الكسل واليأس ومعرفة إني صعب أفتكر الباسوورد ، وأشياء أخري برضه! ، كان كل ده كفيل إنه يمنحني الإحساس ده بإني مش حأدخل تاني ، بس الحمد لله دخلت .. يااااه .. الكتابة هنا ليها طعم مختلف عن الكتابة في أي مكان تاني والله العظيم ، صحيح كفاية لكده إني أبقي عارف إني بأكتب في المكان بتاعي أنا وبس ، بتاعي فحت ، لكن ده مش السبب الوحيد .. حد يعرف أنا أنشأتك ليه ؟ وإيه الظروف اللي خلتني أعملك وأكتب فيكي أول تدوينة في حياتي ؟؟؟ اللي هي دي " الأولة في التدوين " حد يعرف إن أنا أول ما أنشأتك كان تقريباً في نفس الوقت من سنتين فاتوا ؟؟؟ أو بعدها بيومين تلاتة فقط ؟!!! إنتي بتمثليلي حاجة كبيرة أوي .. لما حسيت إني مخنوق جداً ومش لاقي مكان أتكلم فيه وأقول كل اللي أنا عايز أقوله عملتك عشان أتكلم براحتي هنا .. عشان أقول اللي كان مكتوم في نفسي من سنين .. يعني مش بس ده المكان بتاعي ، لكنه كمان المكان اللي لجأتله في وقت ماكانش فيه مكان تاني ، وأخيراً ده المكان اللي بيعيدلي ذكريات فترة من أفضل الفترات اللي عشتها في حياتي .. فترة الـ18 يوم .. ! حاجات كتير أوي إتغيرت من أيامها .. الناس ما بقتش الناس .. الأهداف والمعايير وحتي المبادئ نفسها إتغيرت وإتبدلت .. وددخلنا خلاص فعلياً في المرحلة الأولي من الحرب الأهلية .. ! تصدقي إن بقي في رئيس ؟!!! آه مانا ما دخلتش من قبل الإنتخابات بس ده بقي اللي حصل .. بقي فيه رئيس للبلد .. ! ما تسألينيش الرئيس ده ساكت ليه علي اللي بيحصل وسايب البلد تدخل في النفق ده ، لإني مش عارف الإجابة .. كان نفسي إن ده ما يحصلش ، لكن زي ما بيقولوا سبق السيف العزل .. مش حتكلم كتير دلوقتي في الموضوع ده ، حأستني لما أشوف إيه اللي حيحصل .. بس كان لازم أقول الكلمتين اللي مالهومش لازمة عند حد غيري دول .. بس إرتحت .. إرتحت أوي لدخولي هنا من تاني ، ووعد إني بإذن الله مش حأنقطع عن هنا أبداً .. سلام ..